Auch in diesem Jahr zog es unsere jungen Athletinnen und Athleten in die Lenk anlässlich des SCHÜLALA. Es wurde fleissig trainiert und gelacht.

Mit einer Teilnehmerzahl von 20 Kindern hat sich diese im Vergleich zum Vorjahr beinahe verdoppelt. Mit viel Freude haben uns diese Zeilen aus dem diesjährigen SCHÜLALA erreicht:

Lagerbericht

D Reis het am haubi 8i am Morge im Prehl no gstartet. Nachere 2h Reis simer im regnerische Lenk acho. Di erste Trainings si Speer und Sprint gsi, womer probiert hei Regewürmer z faa und vo ihne wegzcho. Wöus nachem Picknick immerno nid het ufghört regne, simer nachere Witsprung und Bäueliiheit id Halle go Staffle mache. Nachere warme Duschi hets feini Pizza gä, derna e lustige Spiuaabe. 

Am Sunntimorge si aui am 6:15 gweckt worde vo de lute Jungs. Isch grad gäbig gsi fürs Morgejogge, de si aui scho wach gsi. Nachem feine Zmorge, simer wider ufe Trainingsplatz zum d Technik im Chugustosse und Hochsprung z verbessere. Für paari isches dr erst Versuech im Chugustosse gsi, het aber aune Spass gmacht. Zum Zmittag hets Nüdeli gä und nachere churze Pouse wo aui wider Energie hei chönne tanke, simer as Hürdele, Staffle und Americaine. Dasmau isch zwar z Wetter guet gsi, defür hets nume e chauti Duschi gä... Zum Znacht hets Fajitas gä. Dasmer das Lager mitemne spassige Aabe chöi abschliesse, simer id Halle und hei e coole Spiuaabe gmacht mit ganz viune ungerschidliche Glücks-, Wüssens- und Zuefausspili und Quiz. Zum de Spiuaabe abschliesse, hei aui Gruppene e chlini Show vorgsteut. Nachem Dessert wider im Huus isch ou scho Nachtrue gsi und aui si müed igschlafe.

Zum letzte Morgejogging simer go wisse Hei spile und es het wider es feins Zmorge gä. Nachem packe, putze und ufrume hei aui Chind d Möglechkeit gha e KidsCup z mache. Mir si am See go brätle zum Zmittag und es het no e feini Glacé gä (Merci Thomas), e Reis mitem Zügli (Merci Thomas) unf e riese Wasserschlacht (Merci Quentin). 

Danke a aui und gueti Erholig

(Gschribe vo Elise, Talya-Lynn, Gwanaelle, Caroline & Céline)